Psa 28 | PONPDN | STEP | MAING, ai paipalap, I lao likwir wong komui, kom der kotin sapaimokid, pwe ma re pan sapaimokid, i pan duet ir, me pan lokidokila nan por o.

Psalms 28

1 MAING, ai paipalap, I lao likwir wong komui, kom der kotin sapaimokid, pwe ma re pan sapaimokid, i pan duet ir, me pan lokidokila nan por o.
2 Kom kotin mangi ngil en ai ngidingid, I lau likwir won komui, I lao kapa wong pa I kat mol omui saraui.
3 Re der kotin kasapoko ia la iangaki me sapung kan, iangaki me wia sued, me kin lokaia kaselel ong men impa, ap lamelame sued nan mongiong arail.
4 Kotin depuk ong ir duen ar dodok o duen ar tiak sued; kotiki ong ir duen dodok en pa arail; katini ong ir duen ar wiawia.
5 Pwe re sota insenoki dodok en Ieowa de wiawia en lim a kan; e me a pan kotin kawe ir ala, a sota kauada.
6 Kaping ong Ieowa, pwe a kotin erekier ngil en ai ngidingid.
7 Ieowa kel pa i o pere pa i, mongiong i kin liki i, o sauasa pa i mia. Mongiong i liki i o i pan danke i ki ai kaul.
8 Ieowa kelel parail; I me manaman ong sauasa sapwilim a me keidier.
9 Kotin sauasa sapwilim omui aramas omui soso, o kotin kamana ir o apwali irail ada kokolata!